اننت ناگ/لیفٹیننٹ گورنر نے مشیر راجیو رائے بھٹناگر نے آج یہاں فِش فارمنگ پروجیکٹ کو کر ناگ کا دورہ کیا اور اِس کے کام کاج کا جائزہ لیا۔
مشیر راجیو رائے بھٹناگر کے ہمراہ ڈائریکٹر فشریز جے اینڈ کے محمد فاروق ڈار ، چیف پروجیکٹ آفیسر غلام محی الدین وانی اور محکمہ کے دیگر اَفسران بھی تھے۔
مشیر موصوف نے دورے کے دوران فارم کے مختلف ڈویژنوں کا معائینہ کیا اور فارم میں ٹرائوٹ کے بیج، فیڈ اور بروڈسٹاک کا جائزہ لیا۔
اُنہوں نے اِس موقعہ پر اَفسران کے ساتھ بات چیت کرتے ہوئے ماہی پروری شعبے میں نوجوانوں کے لئے ماہی پالن میں جدید ٹیکنالوجی کے اقدام سے روزگار کے مزید مواقع پیدا کرنے پر زور دیا۔اُنہوں نے نقصانات کو کم کرنے کے لئے پوسٹ ہارویسٹ مینجمنٹ پر بھی زور دیا۔
مشیر موصوف نے کہا کہ فِش فارمنگ حکومت کی معاشی نمو کو تیز کرنے اور جموںوکشمیر کے نوجوانوں کے لئے روزگار کے مواقع پیدا کرنے کے اَقدامات کا ایک اہم جز ہے ۔ اُنہوں نے پروجیکٹ کے اِنتظام کی حوصلہ اَفزائی کی کہ وہ مچھلی فارمنگ کی جدید ٹیکنالوجی اور طریقوں کو تلاش کریں جو پیداوار اور منافع میں اِضافہ کرسکیں۔
مشیر راجیو رائے بھٹناگر نے دیر پا اور ماحولیاتی طورپر ذمہ دار ماہی پروری کے طریقوں کی اہمیت پر بھی زور دیا۔اُنہوں نے صارفین کی بڑھتی ہوئی ضروریات کو پورا کر نے کے لئے مچھلی کی پیداوار میں اِضافہ کرتے ہوئے خطے کے ماحولیاتی توازن کو برقرار رکھنے کی ضرورت پر زور دیا۔
دورے کے دوران ڈائریکٹر فشریز نے مشیر موصوف کو جانکاری دی کہ یہ منصوبہ ایشیا کا سب سے بڑا ٹرائوٹ فارم ہے ۔اُنہوں نے مشیر کو فارم کے مختلف آپریشنز اور کام کے بارے میں آگاہ کیا۔
ڈائریکٹر فشریز نے بتایا کہ ٹرائوٹ کے بیجوں کی پیداوار 36فیصد بڑھ کر 14.05 لاکھ تک پہنچ گئی ہے جبکہ گزشتہ برس کے دوران 10.32لاکھ کی پیداوار ریکارڈ کی گئی تھی۔ اُنہوں نے مشیر کو بتایا کہ معیاری ٹرائوٹ بیج جموں و کشمیر یوٹی میں سرکاری اور نجی شعبے کے اِکائیوں او ردیگر ریاستوں جیسے سکم ، تامل ناڈو ، ہماچل پردیش اور لداخ کو بھی فراہم کیا جارہا ہے۔
اُنہوں نے مشیر موصوف کو ایچ اے ڈی پی کی عمل آوری کے بارے میں بھی بتایا جس کا مقصد مقامی نوجوانوں کے لئے روزگار کے مواقع پیدا کرنے کے ساتھ2026-27ء تک یوٹی کی مچھلی پیداوار کو دوگنا کرنا ہے۔
مشیر راجیو رائے بھٹناگر کو یہ بھی جانکاری دی گئی کہ ہیچری یونٹوں کو دو ، تین درجے کے نظام میں اَپ گریڈ کرنے ، ریس ویز کو مضبوط بنانے اور 2.50 کروڑ کی لاگت سے ایک نئی ٹرائوٹ فیڈ مل کی تعمیر سے کوکر ناگ پروجیکٹ کی اَپ گریڈیشن اور جدید کاری کا کام شرو ع کیا گیا ہے۔
