سرینگر / 24مارچ /سرینگر کے مختلف علاقوں میں سمارٹ میٹر وں سے چھیڑ چھاڑ کے 70 واقعات درج ہونے کے بعد حکام نے سمارٹ میٹر وں کے ساتھ چھیڑ چھاڑ کرنے کے الزام میں 272 صارفین کے خلاف ایف آئی آر درج کرنے کا عمل شروع کیا ہے۔ میٹروں کے ساتھ چھیڑ چھاڑ کرنے والے صارفین کی فہرست تیار کی جا رہی ہے اور ان کے خلاف جلد کارروائی شروع کر دی جائے گی۔
پچھلے کئی ماہ سے کشمیر پاور ڈسٹری بیوشن کارپوریشن لمیٹڈ پورے کشمیر میں سمارٹ میٹروں کی غیر قانونی ہکنگ اور چھیڑ چھاڑ کے خلاف کارروائی کر رہی ہے۔
کے پی ڈی سی ایل کی جانب سے ایکس پر کئی ویڈیوز اپ لوڈ کی گئیں جن میں دیکھا جا سکتا ہے کہ بہت سے صارفین سمارٹ میٹروں کے ساتھ کھلواڑ کرتے ہوئے پائے گئے۔جس کے چلتے پی ڈی سی ایل نے ایک قدم آگے بڑھاتے ہوئے ان صارفین کی فہرست جاری کر دی ہے، جو سمارٹ میٹروں کے ساتھ چھیڑ چھاڑ کرتے پائے گئے تھے، ان کے خلاف قانونی کارروائی کیلئے انتظامیہ کو بھیج دیا گیا ہے۔اس سلسلے میں، ایک ٹیکنیکل آفیسر نے چیف انجینئر کو ایک باضابطہ مکتوب جاری کیا ہے جس میں سمارٹ میٹر سے چھیڑ چھاڑ کے 70 واقعات کی تصدیق کی گئی ہے۔اس میںلکھا گیا ’’ آپ کی فوری توجہ نصب کیے گئے سمارٹ میٹروں سے چھیڑ چھاڑ کے بارے مبذول کرائی جاتی ہے ‘‘ ۔ جیسا کہ فہرست سے دیکھا جا سکتا ہے، سی آئی ایس نے سمارٹ میٹر سے چھیڑ چھاڑ کے 70 کیسوں کی تصدیق کی ہے، جس کے بعد ان کو معائنہ کے دوران ضبط کر لیا گیا۔
اس میں مزید کہا گیا ہے کہ اس سلسلے میں، مجھے آپ کو مطلع کرنے کی ہدایت کی گئی ہے کہ ذیل میں دی گئی 11 سب ڈویژنوںکے متعلقہ ایس ڈی اوز کو ہدایت کی جائے کہ وہ متعلقہ سب ڈویژنوںکے دائرہ اختیار میں آنے والے تھانوں میں اسمارٹ میٹروں کے ساتھ چھیڑ چھاڑ کیلئے فوری طور پر ایف آئی آر درج کریں۔
سرکاری اعلامیہ کے مطابق، 3 صارفین زکورا سے، 21 باغات سے، 9 چھانہ پورہ سے، 16 واتل کدل سے، 3 کا حول سے، 2 کا کھنموہ سے، 9 کا حضوری باغ سے، 3 کا زینکوٹ سے، 1 کا کرن نگر سے، 2 کا نوا کدل اور ایک کا راج باغ سے ہیں۔ اب یہ افسران کو ہدایت کی گئی ہے کہ وہ مندرجہ ذیل 02 سب ڈویژنوں کے متعلقہ SDOs کو ہدایت کریں کہ وہ سمارٹ میٹر کے ساتھ چھیڑ چھاڑ کے لیے فوری طور پر دائرہ اختیار میں آنے والے تھانوں میں ایف آئی آر درج کریں۔ادھر ذرائع نے بتایا کہ ایک اور فہرست تیار کی جا رہی ہے اور ان کے خلاف جلد کارروائی شروع کر دی جائے گی۔