سری نگر/چیف سیکرٹری اَتل ڈولو نے 21؍ جون 2024 کو منائے جانے والے 10 ویں بین الاقوامی یوگا ڈے کی تقریبات کے موقعہ پر آج مائی گوو پورٹل https://jk.mygov.in/پر جموں و کشمیر کے شہریوں کے لئے متعدد آن لائن مقابلوں کاآغاز کیا۔
اِن مقابلوں میں’یوگا فار سیلف اینڈ سوسائٹی‘ کے عنوان سے منعقد ہونے والے یوگا ڈوڈل چیلنج، مضمون نگاری، پوسٹر سازی اور کہانی سنانے والے ویڈیو مقابلے شامل ہیں۔ یہ مقابلے جموں و کشمیر مائی گوو پورٹل پر لائیو ہیں اور رجسٹریشن 30 ؍جون 2024 ء تک کھلی ہے۔ پہلے نمبر پر آنے والے کو 10 ہزار روپے، دوسرے کو 8 ہزار روپے اور تیسرے کو 5 ہزار روپے کا نقد انعام دیا جائے گا۔ دلچسپی رکھنے والے شرکأ مائی گوو پورٹل پر اندراجات رجسٹر اور جمع کرسکتے ہیں۔
اِس کے علاوہ یہ پورٹل شہریوں کو 30 ؍جون 2024 ء تک اَپنی سیلفیز اَپ لوڈ کرنے کا موقعہ فراہم کرتا ہے۔ اِس سلسلے میں ایک کسٹم فریم تیار کیا گیا ہے تاکہ شہری اَپنی یوگاسیلفی کا اِشتراک کرسکیں اوریوگا، تندرستی اور خود کی دیکھ ریکھ کی تحریک کو فروغ دے سکیں۔
چیف سیکرٹری نے اِن مقابلوں کا آغاز کرتے ہوئے متعلقہ اِداروں سے کہا کہ وہ سکولی بچوں سمیت زیادہ سے زیادہ شہریوں کو مواقع فراہم کریں۔ اُنہوں نے ضلع ترقیاتی کمشنروں پر زور دیا کہ وہ ضلعی سطح پر شہریوں کی شمولیت کو فروغ دیں۔
اُنہوں نے یوگا کی اہمیت پر زور دیتے ہوئے کہا کہ یہ قدیم مشق ذہن سازی کی تکنیک کو فروغ دیتی ہے جو آرام کے ساتھ ساتھ تناؤ اور اِضطراب کو کم کرنے میں مدد دیتی ہے۔ اُنہوں نے کہا کہ یہ آسنوں، سانس لینے کی تکنیک ، مراقبہ اور اخلاقی ہدایات سے متوازن کرکے جسمانی، ذہنی اور روحانی صحت کو بہتر بناتا ہے۔
چیف سیکرٹری اَتل ڈولو نے کہا کہ یوگا اب تھراپی کی ایک تیزی سے مقبول شکل ، مقابلہ کرنے کا طریقۂ کار اور ذہنی صحت کے لئے تکمیلی علاج بن گیا ہے ۔
اُنہوں نے لوگوں سے کہا کہ وہ مقابلوں میں بھرپور حصہ لیں تاکہ یوگا کو اَپنی زندگی میں شامل کرکے محسوس کی جانے والی تبدیلیوں کو بانٹ سکیں۔ اُنہوں نے اِس بات کا اعادہ کیا کہ ان اَقدامات کا مقصد جموں و کشمیر کے شہریوں کو مجموعی فلاح و بہبود کے لئے یوگا کو اَپنانے اور اپنے ذاتی سفر کو بانٹنے کی ترغیب دینا ہے جس سے صحت اور ہم آہنگی کے ذریعہ متحد کمیونٹی کو فروغ ملے گا۔
چیف سیکرٹری نے شرکأ سے اپیل کی کہ وہ مائی گوو پورٹل پر رجسٹرکریں اور اَپنے اندراجات جمع کریں اور پورے خطے میں بین الاقوامی یوگاڈے کی تقریبات میں شامل ہوں۔
اِس موقعہ پر مختلف محکموں کے اِنتظامی سیکرٹریز ، سربراہان ، ضلع ترقیاتی کمشنران ، اَفسران ودیگر متعلقین بھی موجود تھے۔
