سری نگر،16 اگست(یو این آئی)نیشنل کانفرنس کے نایب صدر عمر عبداللہ کا کہنا ہے کہ اسمبلی انتخابات کے لئے کسی پارٹی کے ساتھ اتحاد کے کافی کم امکانات ہیں۔انہوں نے ساتھ ہی کہا کہ ان کی پارٹی الیکشن لڑنے کیلئے تیار ہے۔ان باتوں کا اظہار موصوف نے سری نگر میں ایک پریس کانفرنس کے دوران کیا۔انہوں نے کہاکہ جموں وکشمیر میں اسمبلی الیکشن کرانے کا فیصلہ خوش آئند بات ہے اور یہ کہ نیشنل کانفرنس چناو کے لئے پوری طرح سے تیار ہے۔انہوں نے مزید بتایا کہ چونکہ الیکشن کمیشن آف انڈیا نے کم سے کم وقت میں چناو کرانے کا فیصلہ لیا لہذا کسی پارٹی کے ساتھ اتحاد کے کافی کم امکانات موجود ہیں۔
عمر عبداللہ نے کہاکہ انتخابات سے قبل کسی بھی پارٹی کے ساتھ اتحاد کرنا خارج از امکان ہے۔ایل جی انتظامیہ کی جانب سے پولیس اور سیول انتظامیہ میں تبدیلیوں اور تقرریوںمکے احکامات صادر کرنے کے بارے میں پوچھے گئے سوال کے جواب میں عمر عبداللہ نے کہاکہ ایسا پہلی بار دیکھا گیا ہے۔انہوں نے کہاکہ انتخابات کے اعلان سے چند گھنٹے پہلے بڑے پیمانے پر تبدیلیوں اور تقرریوں کے احکامات صادر کرنا سمجھ سے بالا تر ہے اور اس حوالے نیشنل کانفرنس الیکشن کمیشن کو آگاہی فراہم کریں گی۔
