چٹان نیوز ڈیسک
جموں،25مارچ :کورٹ کمپلیکس جانی پور جموں میں گذشتہ روز غیر سرکاری تنظیم گلوبل پیس آرگنائزیشن(G-PEACE)نے ینگ لائرز ایسو سی ایشن جموںوکشمیر کے اشتراک سے میگا بیداری اور عطیہ خون کیمپ کا اہتمام کیا جس میں رضاکارانہ طور 62وکلاء اور کورٹ عملہ کے کچھ ملازمین نے عطیہ خون پیش کیا۔
وطن ِ عزیز کی خاطر اپنی قیمتی جانوں کا نذرانہ پیش کرنے والے سردار بھگت سنگھ، شیوا رام راج گورو اور سکھ دیو تھاپر کو خراج ِ عقیدت پیش کرنے کے لئے منعقدہ اِس کیمپ کا افتتاح جموں وکشمیر ہائی کورٹ جج جسٹس تاشی ربستان نے کیا جنہوں نے بطور مہمان خصوصی تقریب میں شرکت کی۔
ایڈووکیٹ جنرل ڈی سی رینہ اور ہائی کورٹ بار ایسو سی ایشن جموں کے صدر سنیئر ایڈووکیٹ ایم کے بھاردواج مہمانان ِ ذی وقار تھے۔ اس موقع پر شہدا ء کو گلہائے عقیدت پیش کیاگیا۔
جسٹس تاشی ربستان نے کورٹ میں اپنی نوعیت کے پہلے ایسے کیمپ کا انعقاد کرنے پر نوجوان وکلاء اور گلوبل پیس آرگنائزیشن کے رضاکاروں کی تعریف کرتے ہوئے کہاکہ انسانیت کی خدمت کا یہ جذبہ قابل ِ رشک ہے۔
انہوں نے اُمیدظاہر کی کہ ایسے پروگرام آئندہ بھی منعقد کئے جاتے رہیں گے۔ ایڈووکیٹ جنرل ڈی سی رینہ اور بار ایسو سی ایشن صدر ایم کے بھاردواج نے بھی ڈونرز کی حوصلہ افزائی کی اور منتظمین کی تعریف کی۔ نظامت کے فرائض ایڈووکیٹ الطاف حسین جنجوعہ اور ینگ لائرز ایسو سی ایشن جنرل سیکریٹری یاسر فاروق خان نے انجام دیئے جبکہ شکریہ تحریک گلوبل پیس آرگنائزیشن چیئرمین ایڈووکیٹ شیخ الطاف حسین نے ادا کی۔
اس موقع پر بار ایسو سی ایشن کے عہدیداران کے علاوہ سنیئر ایڈووکیٹ اسلم گونی، سنیئر ایڈووکیٹ وکرم شرما، سابقہ اسسٹنٹ سالسٹر جنرل آف انڈیا کے کے پنگوترہ، سابقہ سنیئر ایڈیشنل ایڈووکیٹ جنرل حسین احمد صدیقی، ایڈووکیٹ ایچ سی جلمیریا، اجے گندوترہ، شیخ شکیل احمد، خالد مصطفی بھٹ، سورج سنگھ، عرفان خان، شیخ ایاز حسین، اومیش شرما، نریندر شرما، امت منہاس، بندوشیر ابرول ، ظفر چودھری، منیش چوپڑہ،امجد خان، ترون دتہ، فردوس عاشق ایڈووکیٹ، سپریہ گندوترہ، شمس الدین شاز، بلبیر ٹھاکر، سکندر وانی، تحریز چودھری، پلک وزیر، آصف خان، دگوجے سنگھ، اعجاز احمدایڈووکیٹ، تُشار چوپڑہ اور انیش دوبہے بھی موجود تھے۔ ینگ لائرز ایسو سی ایشن صدر ایڈووکیٹ روہت شرما کے فعال کردار اور گورنمنٹ میڈیکل کالج اینڈ اسپتال بخشی نگر کے بلڈ بنک کی میڈیکل ٹیم کے تعاون سے منعقدہ کیمپ میں 62رضاکاروں نے خون کا عطیہ پیش کیا۔
