سرینگر ، مارچ30:
اپنی پارٹی صدرسعید محمد الطاف بخاری نے نوجوانوں کو مشورہ دیا ہے کہ وہ بندوق اُٹھانے کے بجائے اپنی صلاحیتوں کو جموں وکشمیر کے لوگوں کو ترقی کی راہ پر گامزن پر کرنے کے لئے استعمال کریں۔ انہوں نے کہاکہ اپنی پارٹی ایک بہترین سیاسی پلیٹ فارم ہے جس نے صداقت پرمبنی سیاست سے وادی میں سیاسی منظر نامہ تبدیل کیا ہے۔ یہ بات باعثِ اطمینان ہے کہ جموں وکشمیر کے نوجوان اپنی پارٹی میں گہری دلچسپی لے رہے ہیں۔
موصوف نے ان باتوں کا ذکر پارٹی مرکزی دفتر واقع ایم ٹو چرچ لین میں منعقدہ تقاریب کے دوران کیا جس میں کثیر تعداد میں نوجوانوں نے پارٹی کا دامن تھاما۔ الطاف بخاری نے کہاکہ اپنی پارٹی کا مقصد بے روزگار نوجوانوں کو مواقعے فراہم کرنا ہے کیونکہ ہمارا ماننا ہے کہ نوجوانوں کو بندوق نہیں اُٹھانی چاہئے بلکہ وہ جموں وکشمیر کی ترقی کے لئے اپنا مثبت کردار ادا کریں۔
اس موقع پر خوشی کا اظہار کرتے ہوئے کہاکہ یہ ہمارے لئے انتہائی مسرت کا مقام ہے کہ جموں وکشمیر کے لوگوں میں شعور پیدا کرنے میں پارٹی نے بڑی کامیابی حاصل کی ہے ۔ بڑی تعداد میں مختلف سیاسی جماعتوں کو چھوڑ کر لوگ ہماری جماعت کا حصہ بن رہے ہیں اور اُمید ہے کہ ہم مل کر سماج میں تبدیلی لاسکتے ہیں۔
اس موقع پر پی ڈی پی چھوڑ کر اپنی پارٹی میں شامل ہونے والے سنیئرلیڈر میر انتخاب کو پارٹی کا صوبائی سیکریٹری کشمیر بنایاگیا۔ شیخ یونس احمد، رحیم الاسلام، ایڈووکیٹ عبدالجید، خالد شیروانی، مہراج الدین بھٹ نے بھی پارٹی میں شمولیت اختیار کی۔ دریں اثناء ایک پارٹی دفتر پر ہی منعقدہ ایک اور تقریب میں سرکردہ سیاسی لیڈران ورکران نے شمولیت اختیار کی جن میں غلام محی الدین ڈار، سید فاروق بخاری، حسیب اللہ زرگر، طارق احمد لاوے، منظور احمد، مشتاق احمد، رشید فاروق بھٹ، فیاض احمد، فیصل میر، طارق احمد، الطاف تنویر، سربلند خان، نیاز احمد، محمد اشرف، بلال احمد، محمد اسلم اور نصار احمد وغیرہ نے بھی اپنی پارٹی میں شمولیت اختیار کر لی۔ان کا خیر مقدم کرتے ہوئے الطاف بخاری نے اُن سے اپیل کی کہ وہ متعلقہ علاقوں میں اپنی پارٹی کے پروگرام اور پالیسیوں سے لوگوں کو آگاہ کریں۔ تندہی اور محنت ولگن کے ساتھ اپنے اپنے علاقوں میں لوگوں کے مسائل ومشکلات حل کرنے میں اپنا نمایاں کردار ادا کریں۔
انہوں نے کہاکہ یہ ایک خوش آئند بات ہے کہ لوگ ترقی اور خوشحالی کے لئے ہمارے ساتھ شامل ہورہے ہیں۔ اس تقریب میں پارٹی سنیئرلیڈران بشمول نائب صدر ظفر اقبال منہاس، ریاستی سیکریٹری اور پارٹی ضلع صدر بڈگام منتظر محی الدین، میڈیا کارڈی نیٹر فاروق اندرابی، ڈی ڈی سی ڈاڈسر اور اپنی پارٹی صوبائی سیکریٹری کشمیر اوتار سنگھ ترالی، جنرل سیکریٹری ایس ٹی ونگ خالد بڈانہ، نائب صدر ضلع سرینگر اعجاز راتھر بھی موجود تھے۔
