سرینگر،23مارچ:
مختلف سرکاری معاونت والی اسکیموں کے بارے میں لوگوں میں بیداری لانے اور ترقیاتی صحافت کے جذبے کو فروغ دینے کے لیے میڈیا کے کردار کو اجاگر کرنے کے مقصد سے پریس انفارمیشن بیورو (پی آئی بی) سری نگر نے بدھ کو کانفرنس ہال ڈی سی آفس کپواڑہ میں ایک روزہ میڈیا ورکشاپ کا انعقاد کیا۔ ورکشاپ میں کپواڑہ اور ہندواڑہ کے صحافیوں کی مرکزی معاونت والی مختلف اسکیموں اور ترقیاتی صحافت میں میڈیا کے کردار کے بارے میں جانکاری اور صلاحیت کی تعمیر پر توجہ مرکوز کی گئی ۔
یہ پروگرام ضلعی انتظامیہ کے تعاون سے منعقد کیا گیا اور اس میں تقریباً 50 نامور ذرائع ابلاغ سے وابستہ نمائندوں اور دیگر انتظامی افسران شامل تھے۔ صحافیوں نے ایسے پروگرام کے انعقاد پر پی آئی بی کی کاوشوں کو سراہا۔
اپنے افتتاحی خطاب میں ایڈیشنل ڈپٹی کمشنر، غلام نبی بٹ نے رپورٹنگ سے پہلے حقائق کی جانچ پر زور دیتے ہوئے کہا کہ صحافت نے تاریخی طور پر لوگوں کے نقطہ نظر کو تبدیل کیا ہے۔ انہوں نے کہا کہ سماجی تبدیلی لانے کے لیے تعمیری تنقید کی ضرورت ہے۔ انہوں نے مزید کہا کہ ’’منفی خبریں خطرناک حد تک پھیلتی ہیں، اس لیے ایک صحافی کے لیے ضروری ہے کہ وہ رپورٹنگ کرنے سے پہلے حقائق کو درست طریقے سے جانچ لیں۔‘‘
ڈپٹی ڈائریکٹر پریس انفارمیشن بیورو غلام عباس نے شرکاء سے خطاب کرتے ہوئے پی آئی بی کے کردار پر روشنی ڈالی اور ورکشاپ کے اغراض و مقاصد کے بارے میں تفصیلی جائزہ پیش کیا۔ انہوں نے میڈیا برادری پر زور دیا کہ وہ ترقیاتی کاموں کو ترجیحی بنیادوں پر اجاگر کریں۔ انہوں نے کہا کہ حکومت کے پاس زندگی کے تمام شعبوں کے لیے اسکیمیں اور اقدامات ہیں اور میڈیا کی ذمہ داری ہے کہ وہ ان اقدامات کے زیادہ سے زیادہ استفادے کے لیے انہیں عوامی سطح پر اجاگر کرے۔ مسٹر عباس نے سرحدی ضلع کی ترقی کے لیے ہم آہنگی سے کام کرنے پر میڈیا برادری اور ضلعی انتظامیہ کو مبارکباد دی۔
اس موقع پر میڈیا اینڈ کمیونیکیشن آفیسر پی آئی بی سرینگر ماجد پنڈت نے کہا کہ میڈیا معاشرے اور انتظامیہ کے درمیان براہ راست رابطے کا کام کرتا ہے اور اس کڑی کو مضبوط کرنے کی اشد ضرورت ہے۔ ترقیاتی رپورٹنگ کی ضرورت پر زور دیتے ہوئے انہوں نے کہا کہ میڈیا کو معاشرے کی ہمہ گیر ترقی کے لیے آگاہی پیدا کرنے میں فعال کردار ادا کرنا چاہیے۔ اس موقع پر نیوز ایڈیٹر، آل انڈیا ریڈیو سرینگر اشفاق شاہ نے ابلاغ کے ذریعے ترقی کو یقینی بنانے کے لیے ذرائع ابلاغ کے اثرات کے بارے میں بات کی۔ نیوز ایڈیٹر دور درشن کیندرا سرینگر، شبیر ڈار نے مشکل وقت میں انتظامیہ اور لوگوں کے درمیان ہم آہنگی پیدا کرنے کی ضرورت پر بات کی۔ چیف ایجوکیشن آفیسر کپوارہ اے حامد فانی نے ضلع کے تعلیمی منظر نامے کا تفصیلی جائزہ پیش کیا۔ سینئر صحافی سید اشفاق نے نچلی سطح تک پہنچنے کے لیے مقامی میڈیا کے ذریعے ترقیاتی مواصلات کے بارے میں بات کی۔ میڈیا اینڈ کمیونیکیشن آفیسر پی آئی بی سرینگر، مظفر وانی نے شرکاء کو معروضیت کے معیار کو برقرار رکھنے کے لیے میڈیا کی اخلاقیات کے بارے میں بتایا۔ لیکچرز کے بعد انٹرایکٹو سیشنز ہوئے جس میں شرکاء نے ماہرین کے ساتھ اپنے تبصرے اور مشاہدات پیش کیے۔ صحافیوں نے مستقبل میں ایسے مزید پروگراموں کے لیے اپنے ارادوں کا اظہار کیا۔
