نئی دہلی، 26 مارچ :
ملک میں تیل کی مارکیٹنگ کمپنیوں نے ہفتہ کو پٹرول اور ڈیزل کی قیمتوں میں ایک بار پھر 80 پیسے فی لیٹر کا اضافہ کیا۔ گزشتہ پانچ دنوں میں پٹرول اور ڈیزل کی قیمتوں میں چوتھی بار اضافہ ہوا ہے۔
قومی دارالحکومت دہلی میں پٹرول اور ڈیزل کی قیمتوں میں اضافے کے ساتھ یہاں اب پٹرول 98.61 روپے اور ڈیزل 89.87 روپے فی لیٹر ہو گیا ہے۔ جبکہ جمعہ کو پٹرول کی قیمت 97.81 اور ڈیزل کی قیمت 89.07 تھی۔
تیل کمپنیوں نے 137دن تک ’رعایت و راحت ‘دینے کے بعد پٹرول اور ڈیزل کی قیمتوں میں اضافہ کرنا شروع کر دیا ہے، جس کی وجہ سے اب تک پٹرول اور ڈیزل کی قیمتوں میں میں 3.20 پیسے کا اضافہ ہوچکا ہے۔
اس اضافے کی وجہ سے ممبئی میں پٹرول اور ڈیزل کی قیمتیں بالترتیب 113.35 روپے اور 97.55 روپے فی لیٹر ہو گئی ہیں۔
یوکرین پر روس کے حملے کی وجہ سے عالمی سطح پر تیل اور قدرتی گیس کی سپلائی متاثر ہونے پر تیل اور قدرتی گیس کی قیمتوں میں اضافہ ہوا ہے۔ بین الاقوامی سطح پر اس کی وجہ سے خام تیل 13 سال کی بلند ترین سطح پر پہنچ گیا ہے۔
عالمی منڈی میں خام تیل کی قیمتوں میں مسلسل اتار چڑھاؤ آرہا ہے۔ لندن برینٹ کروڈ 120.65 ڈالر فی بیرل اور یو ایس کروڈ 0.23 فیصد اضافے کے ساتھ 112.60 ڈالر فی بیرل پر ٹریڈ کر رہا ہے۔
پٹرول اور ڈیزل کی قیمتوں کا روزانہ جائزہ لیا جاتا ہے اور اسی کی بنیاد پر نئی قیمتیں روزانہ صبح 6 بجے سے لاگو ہوتی ہیں۔(یو این آئی)
