سری نگر،14 مئی:
ملک کی فلم انڈسٹری بالی ووڈ اداکار جہاں وادی کشمیر کے دلفریب ودلکش سیاحتی مقامات میں فلموں کی شوٹنگ کرنے میں خاصی دلچسپی رکھتے ہیں وہیں تھکن کو دور کرنے اور اپنے ذہن و دماغ کی تر وتازگی کے لئے کشمیر کی سیر کرنا بھی ان کی ترجیحات میں شامل رہتا ہے۔یہی وجہ ہے کہ وادی کے کسی نہ کسی سیاحتی مقام پر ان ادا کاروں کو کہیں نہ کہیں ضرور شوٹنگ، ٹریکنگ یا سیاحت کرتے ہوئے دیکھا جا رہا ہے۔
حال ہی میں معروف گلو کار اودت نرائن نے یہاں ایک المبم کی ریکارڈنگ کے لئے شوٹنگ کی اور آج بالی ووڈ کی معروف ادا کارہ سارہ علی خان پہلگام میں ٹریکنگ کرتے ہوئے دیکھی جا رہی ہیں۔موصوف ادا کارہ نے جنوبی کشمیر کے مشہور سیاحتی مقام پہلگام میں سطح سمندر سے زائد از 36 ہزار فٹ کی بلندی پر واقع تولین جھیل کے نظاروں سے لطف اندوز ہونے کے لئے 26 کلو میٹروں کی طویل اور دشوار گذار مسافت طے کی۔
اس ٹریکنگ کے دوران سارا علی خان کے ساتھ دو مزید ساتھی تھے جن میں سے ایک مقامی منان ترمبو بھی شامل ہے۔اس ٹریکنگ کا اہتمام آج جموں وکشمیر ماؤننٹنیرنگ فاؤنڈیشن کے صدر دانش دھر کی ’ہائیک دی ٹریلز ایڈونچر پرائیویٹ لمیٹڈ‘ کی جانب سے کیا گیا ہے۔دانش دھر کا کہنا ہے کہ موصوف اداکارہ نے بغیر کسی پریشانی و رکاوٹ کے 26 کلو میٹر کی اس مسافت کوطے کیا۔انہوں نے کہا: ’ہمیں سارہ علی خان کی طرف سے کال موصول ہوئی کہ وہ اپنے دوستوں کے ہمراہ پہلگام میں لدر وٹ کی ٹریکنگ کرنے کی خواہاں ہیں‘۔ان کا کہنا تھا: ’انہیں در اصل لدر وٹ میں قیام کرنا تھا لیکن بعد میں اچانک انہوں نے تولین جھیل کو دیکھنے کا فیصلہ لیا مجھے پہلے یقین ہی نہیں تھا کہ وہ اس قدر طویل مسافت کی ٹریکنگ کر پائیں گی اور ایک ہی دن میں واپس بھی لوٹ سکیں گی‘۔
موصوف صدر نے کہا کہ میں حیران ہوا کہ انہوں نے ایک ہی دن میں یہ ٹریکنگ انجام دی۔دانش دھر بھی اپنے دو ساتھیوں وسیم حسن اور عامر لطیف کے ہمراہ موصوف اداکارہ کے اس ٹریکنگ ٹیم کا حصہ تھے۔ انہوں نے تولین ٹریکنگ کے بعد پہلگام میں ایک رات کو قیام بھی کیا۔
دانش دھر نے کہا: ’میں سمجھتا تھا کہ اداکارہ اور اس کے دوست کافی تھک گئے ہوں گے اور وہ مزید ایک دن پہلگام میں ٹھہرنے کو ترجیح دیں گے‘۔انہوں نے کہا: ’لیکن میں ششدر ہوکے رہ گیا جب وہ صبح کافی چاک و چوبند اور ہشاش بشاش تھے اور دوسرے ٹریکنگ پر جانے کے لئے تیار تھے‘۔ان کا کہنا تھا کہ لدر وٹ ڈھلوان علاقہ ہے اور انہیں وہاں پہنچنے میں پانچ گھنٹے لگ گئے‘۔دانش نے کہا کہ اداکارہ اور اس کے دوستوں نے پیشہ ور طریقے سے ٹریکنگ کی اور رات کو انہوں نے وہیں قیام بھی کیا۔انہوں نے کہا کہ سارا علی خان نے اپنے اور اپنے دوستوں کے لئے کشمیری سبزی ’ہاکھ‘ کی غذا بھی خود ہی تیار کی اور اس کا ایک ویڈیو بھی بنایا۔پ
ہلگام میں ٹریکنگ کے بعد سارا علی خان وادی کے مشہور زمانہ سیاحتی مقام گلمرگ ٹریکنگ کے لئے پہنچی۔سارا علی خان اپنی چھٹیاں اکثر وادی کے سیاحتی مقامات کی سیر میں ہی صرف کرتی ہیں۔انہوں نے گذشتہ سرما میں اپنے بھائی ابراہیم خان کے ہمراہ کئی دن گلمرگ میں گذارے۔یو این آئی
