سری نگر، 18 اگست (یو این آئی) جموں و کشمیر پولیس نے سال 2023 سے اب تک منشیات کے غیر قانونی تجارتی نیٹ ورک کے خلاف کریک ڈائون کے دوران 4 ہزار 5 سو 36 افراد کو گرفتار کیا ہے اور 4 سو 63 افراد کے خلاف پی آئی ٹی این ڈی پی ایس ایکٹ کے درج مقدمے درج کئے ہیں۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ سال 2023 سے منشیات کی غیر قانونی تجارت کے خلاف کریک ڈائون کے دوران 3 ہزار 1 سو 90 مقدمے درج کئے گئے اور 4 ہزار 5 سو 36 افراد کو گرفتار کیا گیا۔
انہوں نے کہا کہ منشیات کی سپلائی کے سلسلے کو توڑنے کے لئے قانون نافذ کرنے والی ایجنسیوں نے منشیات فروشوں کے خلاف پی ٹی آئی این ڈی پی ایس ایکٹ کا اطلاق کیا ہے جس کے نتیجے میں گذشتہ 18 ماہ سے 4 سو 63 افراد کو حراست میں لینے کے احکامات جاری کئے گئے۔
ان کا کہنا ہے کہ ضبط شدہ منشیات کی چوری کو روکنے کے لئے منشیات کو عدالت کے حکم کے مطابق جلا کرتباہ کیا جاتا ہے۔
بیان میں کہا گیا کہ سال 2023 میں 29 ہزار 3 سو 6 کلو منشیات اور 74 ہزار 1 سو 79 ادویات کو تباہ کیا گیا اور سال 2024 کے پہلے 6 ماہ کے دوران 4 ہزار 3 سو 65 کلو منشیات اور 26 ہزار 7 سو 72 ادویات کو تباہ کیا گیا ہے۔
انہوں نے کہا: ‘اسی طرح کے کل 43 معاملات میں جموں و کشمیر پولیس نے نارکو ایکٹ کے تحت سال 2023 سے رہائشی مکانات، اراضی کی صورت میں جائیداد، گاڑیاں وغیرہ کو ضبط کیا ہے جن کی کل قیمت 10.36کروڑ روپیے ہے’۔
ان کا کہنا تھا کہ گذشتہ ڈیڑھ برس کے دوران نارکو ٹیرر نیٹ ورک میں مبینہ طور پر ملوث 39 افراد کو گرفتار کیا گیا اور 19 مقدمات درج کئے گئے۔
موصوف ترجمان نے بتایا کہ سال 2023 کے دوران قانون نافذ کرنے والی ایجنسیوں کی جانب سے 9 ہزار 4 سو 48 کنال اراضی پر پوست اور بھنگ کی غیر قانونی کاشت کو تباہ کر دیا گیا۔
انہوں نے کہا: ‘باز آبادکاری کے محاذ پر محکمہ پولیس نے محکمہ سماجی بہبود کے 4 نشہ چھڑانے کے مراکز کے علاوہ جموں وکشمیر میں 10 ڈرگ ڈی ایڈکشن سینٹر قائم کئے ہیں نیز 21 صحت/ اضافی علاج کی سہولت کے مراکز قائم کئے ہیں۔
انہوں نے کہا کہ سال 2023 میں منشیات کی لت میں پڑنے والوں کے کل 14 ہزار 1 سو 80 او پی ڈیز اور 1 ہزار 9 سو 31 آئی پی ڈی علاج کئے گئے یہ اعداد و شمار سال 2024 کے جون تک بالترتیب 5 ہزار 3 سو 18 اور 5 سو 61 ہے۔
ان کا کہنا ہے کہ اس کے علاوہ جموں وکشمیر میں ڈرگ ڈی ایڈکشن کے 6 پرائیویٹ سینٹر چل رہے ہیں۔
بیان میں کہا گیا کہ نارکو کوارڈینیشن سینٹر (این سی او آر ڈی) کے طریقہ کار کے تحت غیر قانونی منشیات اور منشیات اسمگلنگ سے نمٹنے کے لئے اقدامات کئے جا رہے ہیں جس کی نگرانی چیف سکریٹری کی زیر صدارت این سی او آر ڈی کی با قاعدہ میٹنگوں کے ذریعے کی جا رہی ہے۔
انہوں نے کہا کہ قانون نافذ کرنے والی ایجنسیاں بالخصوص جموں وکشمیر پولیس کو ہدایت دی گئی ہے کہ وہ منشیات اسمگلنگ کے تمام معاملوں میں انٹلی جنس شیئرنگ، سخت کارروائی اور موثر تحقیقات کو یقینی بنائیں۔
ان کا مزید کہنا ہے کہ نوجوانوں کو منشیات کے مضر اثرات سے آگاہ کرنے کے لئے حکومت مختلف ایجنسیوں کے ذریعے این جی اوز اور سول سوسائٹی گروپوں کے ساتھ تعاون کرکے پروگرام منعقد کئے جاتے ہیں۔
