تحریر:نکہت انجم
موجودہ دور مسابقت کا دور ہے۔ طلبہ کیلئے بے شمار چیلنجز ہوتے ہیں جن کا سامنا کرکے ہی وہ کامیابی سے ہمکنار ہوسکتے ہیں۔ ہر شعبے میں بھیڑ لگی ہوئی ہے۔ ہر طالب علم خود کو ثابت کرنے کیلئے اور اپنے امتحانات میں بہتر نتائج اخذ کرنے کیلئے ہر ممکن کوشش کرنا چاہتا ہے۔ ہمارے مطالعے کی تکنیک جتنی مؤثر ہوگی، تصورات جس قدر واضح ہوں گے، اور اپنے شعبے سے متعلق جتنا زیادہ علم ہوگا ہماری کارکردگی اتنی ہی بہترین ہوگی۔ اسی کے پیش نظر طلبہ کیلئے مطالعہ اور بہتر نتائج کیلئے مندرجہ ذیل مشورے حاضر خدمت ہیں۔ مائیں امتحان کے دوران اپنے بچوں کی رہنمائی میں اُن کی مدد کریں :
دلچسپ وسائل مطالعہ کا انتخاب: مختلف طلبہ کی تعلیمی استعدادیں مختلف ہوتی ہیں۔ اس لئے ہمیں اپنے پسند کے وسائل کا انتخاب کرنا چاہئے۔ مثلا: تصویری، سماعتی، حرکتی وغیرہ یہ تعین کریں کہ آپ کیلئے کون سا طریقہ بہتر ہے۔
مطالعے کیلئے مناسب ماحول کا انتخاب: ایک خاموش، روشنی سے بھرپور جگہ کا انتخاب کریں جہاں کسی طرح کا کوئی انتشار نہ ہو اور آپ آرام سے اپنی پڑھائی جاری رکھ سکیں۔
حقیقت پسندانہ اہداف کا تعین کریں : اپنے مطالعے کے اوقات کو مناسب تقسیم الاوقات میں تقسیم کریں اور حقیقت پسندانہ اہداف کا تعین کریں۔
مضامین/موضوعات کو ترتیب دیں : مضامین یا موضوعات کو ان کی اہمیت سے متعلق ترتیب دیں۔ پہلے زیادہ اہم مضامین/موضوعات پر توجہ مرکوز کریں۔ اس کے بعد درمیانی اور آخر میں آسان موضوعات پڑھ لیں۔ شروعات میں اہم یا مشکل موضوع کا مشورہ میں نے اس لئے دیا ہے کہ بالکل شروعات میں ہمارا موڈ فریش ہوتا ہے۔ ہم تازہ دم ہوتے ہیں۔ اس لئے مشکل مضمون بھی بار محسوس نہیں ہوتا ہے۔
وقت کی تقسیم: مخصوص مضامین اور موضوعات کے مطالعے کے لئے وقت کی منظم تقسیم کریں۔ یہ منظم روٹین بنانے میں مدد فراہم کرتا ہے۔ آپ اپنی دن بھر کی سرگرمیوں کا تقسیم الاوقات بھی ترتیب دے سکتے ہیں۔
صحتمند زندگی جئیں : مثبت نتائج حاصل کرنے کے لئے کافی نیند، متوازن غذا، اور تناؤ سے آزاد رہنے والی تکنیکوں کا خیال رکھیں۔
ذہن سازی اور آرام: کسی بھی طرح کے تناؤ سے آزاد رہنے کیلئے خود کی ذہن سازی کریں۔ ذہن کو آرام دیں۔ غیر ضروری باتوں کو سر پر سوار نہ کریں۔
قدر پیمائی اور مطابقت: اپنے مطالعے کی تکنیکوں کا درمیان میں جائزہ لیں اور جو بھی بہتر نتائج دے رہی ہیں انہیں اپنائیں۔ جہاں طریقہ کو تبدیل کرنے کی ضرورت ہے تبدیل کردیں۔
حوصلہ برقرار رکھیں : عظیم مقاصد ذہن میں رکھیں۔ طویل مدتی کامیابی کے منصوبے بنائیں۔ اپنی چھوٹی چھوٹی حصولیابیوں کا جشن منائیں۔ چھوٹی چھوٹی ناکامیوں سے دلبرداشتہ نہ ہوں۔
ان حکمت عملیوں کو اپنی مطالعہ کی روٹین میں شامل کریں، مگر یاد رہے، ہر شخص کی ذہنی استعداد اور صلاحیت الگ الگ ہوتی ہے۔ اس لئے آپ کو جو تکنیک بہتر نتائج دیتی ہے آپ اسے اختیار کریں۔ اس کام میں مائیں اِن کی مدد کریں۔ اس دوران انہیں مختلف تجربے کرنے سے روکیں۔
اِن باتوں کا بھی خیال رکھیں
خود پر اعتماد ررکھیں : خود پر اعتماد اور اپنی قابلیتوں پر یقین رکھیں۔ آپ جتنا بہتر کرسکتے ہیں کریں۔
ہمیشہ نئی چیزیں سیکھیں : ہمیشہ نئی نئی چیزیں سیکھیں اور اپنی شخصیت میں نئی باتیں شامل کریں۔ جب ہم نئی باتوں کی آموزش کے لئے ہمہ وقت تیار ہوتے ہیں ہمیں سیکھنے میں دلچسپی محسوس ہوتی ہے اور ہم جلدی سیکھ لیتے ہیں۔
سماجی مؤثر رابطے: اپنے ساتھیوں کے ساتھ خوشگوار تعلقات بنائیں۔ ان سے مثبت عادتیں سیکھیں۔ ان عادتوں کو اپنائیں۔ اس کے علاوہ مائیں بوقت ضرورت ان سے مدد کیلئے تیار رہیں۔
صحت کی اہمیت: مطالعہ میں گہرائی سے مصروف ہونے کے وجہ سے کبھی کبھی طلبہ اپنی صحت کا خیال نہیں رکھ پاتے ہیں یا اپنی صحت کی جانب سے لاپروا ہوجاتے ہیں۔ امتحان میں بہترین کارکردگی اور بہتر نتائج کیلئے مائیں ان کی صحت کا خیال رکھیں۔
دیگر افراد کے تجربات سے بھی سیکھیں : ہم اپنے اچھے اور برے تجربات سے تو سیکھتے ہی ہیں لیکن ہمیں دیگر افراد کے تجربات سے بھی سیکھنا چاہئے۔ ہم ان کے ساتھ تبادلہ خیال کرسکتے ہیں۔
مطالعہ کو مؤثر بنانے کیلئے اور امتحان میں اِن کی کامیابی کو یقینی بنانے کیلئے، ان مشوروں پر عمل کریں اور انہیں آگے بڑھنے کا حوصلہ دیں۔ مثبت باتیں کہیں۔ محنت کے ساتھ دعا کا اہتمام کرنے کی بھی تلقین کریں۔ اللہ کے حضور جھک کر اپنے بچوں کی دنیا اور آخرت کی کامیابی کی دعائیں مانگیں۔ ان شاء کامیابی ضرور حاصل ہوگی۔
