چٹان ویب ڈیسک
روس نے ایک نئے جوہری صلاحیت کے حامل بین البراعظمی بیلسٹک میزائل ’سرمٹ‘ کا تجربہ کیا ہے جس کے بارے میں روسی صدر پوتن کا دعویٰ ہے کہ یہ دنیا کا بہترین میزائل ہے۔برطانوی خبر رساں ادارے روئٹرز کے مطابق یوکرین پر حملے کے دو ماہ مکمل ہونے سے قبل روس کی جانب سے بدھ کو اس نئے میزائل کا تجربہ کیا گیا ہے۔
روسی وزارت دفاع کے مطابق سرمٹ میزائل سِلو لانچر سے روسی وقت کے مطابق دوپہر ایک بجے داغا گیا۔روس کے صدر ولادیمیر پوتن نے کہا ہے کہ ’یہ میزائل ماسکو کے دشمنوں کو رکنے اور سوچنے پر مجبور کرے گا۔‘
اس سرمٹ نامی اس میزائل پر کئی برسوں سے کام ہو رہا تھا۔ اس کا تجربہ مغربی دنیا کے لیے حیرت کا باعث تو نہیں تاہم یہ ایسے وقت میں لانچ کیا گیا جب خطے میں شدید تناؤ کی کیفیت ہے۔ روس نے یوکرین میں 24 فروری کے بعد اپنے دسیوں ہزار فوجی بھیجے ہیں لیکن ابھی تک وہ کسی بڑے شہر پر مکمل قبضہ نہیں کر سکا ہے۔روئٹرز کے مطابق یوکرین کی وزارت دفاع نے ابھی تک اس میزائل کے تجربے پر کوئی تبصرہ نہیں کیا ہے۔اس موقعے پر پوتن نے کہا کہ’ یہ نیا کمپلیکس اعلیٰ تکنیکی خصوصیات کا حامل ہے اور یہ جدید میزائل شکن دفاع کے نظام کا مکمل توڑ ہے۔ دنیا میں اس کی دوسری مثال نہیں ہے اور نہ ہی دیر تک کوئی ایسا نظام بنا سکتا ہے۔‘
’یہ منفرد ہتھیار ہماری افواج کی دفاعی صلاحیتوں کو بڑھانے کے ساتھ ساتھ ہماے ملک کو بیرونی خطرات سے محفوظ کرنے میں مدد دے گا اور ان قوتوں کو سوچنے پر مجبور کرے گا جو روس کے خلاف جارحانہ عزائم رکھتے ہیں۔‘
خیال رہے کہ آٹھ ہفتے قبل یوکرین پر حملے کا اعلان کرنے کے بعد پوتن نے اپنی جوہری ہتھیاروں کو الرٹ رکھنے کی ہدایات جاری کی تھیں اور مغرب کو مخاطب کرتے ہوئے کہا تھا کہ’ انہیں ایسے نتائج کا سامنا کرنا پڑے جن سے ان کا اس قبل تاریخ میں کبھی واسطہ نہیں پڑا۔‘
واضح رہے کہ روس کے یوکرین پر حملے کے بعد سے اب تک لاکھوں افراد یوکرین سے نقل مکانی کر چکے ہیں جبکہ امریکہ اور اس کے نیٹو اتحادی روس کے خلاف یوکرین کی امداد کر رہے ہیں۔
دو روز قبل پینٹاگون نے کہا تھا کہ یوکرین کو جنگی طیاروں کے پرزوں کی ایک کھیپ موصول ہو گئی ہے۔
