ملک کی عادت عالیہ نے آئین کی دفعہ 370 کو ہٹائے جانے کے حکومتی فیصلے کی تصدیق کی ہے ۔ فیصلے میں حکومت کی طرف سے چار سال پہلے اٹھائے گئے اقدامات کو حق بجانب قرار دیا گیا ۔سوموار کو چیف جسٹس چندرا چوڑ کی طرف سے تحریری فیصلہ پڑھ کر سنایا گیا ۔ فیصلے میں یہ بھی کہا گیا کہ صدارتی راج کے دوران اجرا کئے گئے اقدامات کو چیلنج نہیں کیا جاسکتا ہے ۔ پانچ ججوں پر مشتمل آئینی بنچ نے اس بات کا حوالہ دیا ہے کہ آئین میں دفعہ 370 ایک عارضی دفعہ تھا جس کو تاحیات قائم نہیں رکھا جاسکتا ہے ۔ حکومت نے جو بھی اقدام اٹھایا ہے قانونی طور جائز ہے ۔ تاہم عدالت عالیہ کی طرف سے الیکشن کمیشن کو ہدایت دی گئی ہے کہ اگلے سال کے ستمبر مہینے تک اسمبلی کے لئے انتخابات کئے جائیں اور جموں کشمیر کی ریاستی حیثیت کو بحال کیا جائے ۔ اس دوران لداخ کو یونین ٹیریٹری کے طور بحال رہنے کا بھی فیصلہ دیا گیا ہے ۔ عدالت کی طرف سے دئے گئے فیصلے سے اندازہ ہوتا ہے کہ حکومت نے دفعہ 370 ہٹاکر اندرونی خود مختاری ختم کرنے کے لئے جو بھی اقدامات کئے ہیں ان پر مہر ثبت کی گئی ہے ۔ حکومتی حلقوں کے علاوہ بی جے پی لیڈروں کی طرف سے اس فیصلے پر خوشی اور جوش و خروش کا اظہار کیا گیا ہے ۔ جموں کشمیر کے عوام کی طرف سے کوئی خاص ردعمل نہیں دکھایا گیا ۔ تاہم سیاسی رہنمائوں نے اس بات پر اطمینان کا اظہار کیا کہ اگلے سال کے اختتام سے پہلے کشمیر کے لئے اسمبلی بحال کرنے کی غرض سے انتخابات کئے جارہے ہیں ۔ اس طرح سے جموں کشمیر کے حوالے سے عدالت عالیہ میں دائر مقدمات پر فیصلہ سناکر ایک اہم باب رقم کیا گیا ۔
آئین کی دفعہ 370کے بارے سپریم کورٹ کی طرف سے یہ کہنا کہ آئین کی عارضی شک ہے کوئی نئی بات نہیں ۔ آئین بناتے وقت ہی اس دفعہ کو عارضی قرار دیا گیا تھا ۔ اس کے باوجود ستھر سال تک اس دفعہ کو آئین میں شامل رکھا گیا یہ بڑی بات ہے ۔ اس سے پہلے بھی اس دفعہ کو ہتانے کی کئی بار کوششیں کی گئیں ۔ بی جے پی پہلے روز سے یہ مطالبہ دہراتی رہی ہے کہ ملک میں دو آئین ، دو جھنڈے یا دو وزیراعظم نہیں ہوسکتے ہیں ۔ پارٹی کو جب نریندر مودی کی قیادت میں مضبوط سرکار بنانے کا موقع ملا تو عوام سے کئے گئے وعدے کے مطابق اس دفعہ کو ہٹایا گیا ۔ پارٹی لیڈروں کا کہنا ہے کہ کشمیر میں آئین کی اس دفعہ کا سہارا لیتے ہوئے علاحدگی پسندی کے رجحان کو فروغ دیا گیا ۔ اس وجہ سے ملک کمزور ہوگیا ۔ ملک کو مضبوط بنانے کے لئے حکومت کی طرف سے کئی دوسرے اقدامات کئے گئے ۔ اس دوران دفعہ 370 اور دوسرے ان دفعات کو منسوخ کیا گیا جو اس حوالے سے کسی بھی طرح کے مددگار سمجھے گئے ۔ ان اقدامات کو چیلنج کرنے کے لئے کئی حلقوں کی طرف سے سپریم کورٹ میں مقدمات درج کئے گئے ۔ ان مقدمات پر پچھلے چار سالوں کے دوران طویل شنوائی ہوئی ۔ مقدمات درج کرنے والوں کو ان کے بیانات پیش کرنے کا موقع دیا گیا ۔ لیکن وہ عدالت عالیہ کے جج صاحبان کو یہ باور کرانے میں ناکام رہے کہ مرکزی سرکار کی طرف سے کوئی غیر قانونی اقدامات اٹھائے گئے ہیں ۔ یہ بات ؓڑی اہم ہے کہ جب ملک کی سالمیت کا سوال ہو تو کوئی بھی شہری سرکاری پالیسی سے اختلاف نہیں کرسکتا ہے ۔ ایسا کرنا واضح ملک دشمنی سمجھی جاسکتی ہے ۔ اس کے باوجود سپریم کورٹ کی طرف سے مخالف پارٹیوں کے اعتراضات سنے گئے اور انہیں کھل کر اپنا موقف پیش کرنے کا موقع دیا گیا ۔ تاہم حکومت کا پلڑا بھاری رہا اور عدالت عالیہ نے حکومت کے حق میں اپنا فیصلہ سنایا ۔ اس دوران یہ بات واضح ہوگئی کہ سپریم کورٹ حکومتی اقدامات کو مثبت سمجھ رہی ہے ۔ جموں کشمیر کے سیاسی رہنمائوں نے کئی طرح کی آرا پیش کیں ۔ تاہم ان کا کہنا ہے کہ فیصلہ قبول کرنے کے سوا کوئی دوسرا راستہ نہیں ہے ۔ اس طرح سے دفعہ 370 کے ہٹائے جانے کے حوالے سے عوامی اور سیاسی حلقوں میں جاری بحث قریب قریب ختم ہوگئی اور آگے کا جو راستہ شروع ہونے والا ہے وہ ماضی سے مختلف ہوگا ۔ اس طرح سے جموں کشمیر کو مکمل طور ملک میں ضم کئے جانے کا تاریخی قدم جو 5اگست 2019 کو اٹھایا گیا وہ ایک تاریخی حیثیت اختیار کرچکا ہے ۔ اس کے خلاف اٹھنے والی تمام آوازیں کمزور پڑچکی ہیں اور ایسے کسی بھی اقدام کو غیر آئینی قرار نہیں دیا جاسکتا ہے ۔ وزیراعظم مودی جن کی قیادت میں اس طرح کا قدم اٹھایا گیا ، نے سپریم کورٹ کے فیصلے سے متعلق اپنے تاثرات میں کہا کہ اس سے یہ بات سامنے آگئی کہ ہندوستانی پارلیمنٹ نے 5اگست 2019 کو جو قدم اٹھایا ملک کی عدالت عالیہ اس کو حمایت کرتی ہے ۔ عدالتی فیصلے کو ایک تاریخی فیصلہ قرار دیتے ہوئے اسے ایک پر امید فیصلہ قرار دیا ۔ ان کا یہ بھی کہنا ہے کہ فیصلہ جموں کشمیر کے عوام کے لئے ترقی اور یک جہتی کا باعث ہوگا ۔ وزیرداخلہ جو اس حوالے سے سب سے متحرک سیاست دان تھے نے سپریم کورٹ کے فیصلے کو خوش آئند قرار دیا ۔ دوسرے کئی رہنمائوں نے اس فیصلے کے حق میں بیانات دئے ۔
